ដោយសារមនុស្សមួយចំនួនគិតបែបនេះហើយ ទើបមិនងាយក្លាយជាអ្នកមាននឹងគេ!
១) យល់មិនទាន់ច្បាស់ថា លុយកើតឡើងដោយរបៀបណា
មនុស្សមួយចំនួនគិតថា នៅពេលរៀនសូត្រខ្ពស់ ឬ បញ្ចប់ការសិក្សាជាមួយលទ្ធផលល្អ នឹងក្លាយជាអ្នកមានទ្រព្យសម្បត្តិច្រើនដោយស្វ័យប្រវត្តិនៅពេល អនាគត។ ការពិតទៅចំណុចសំខាន់នៃការអប់រំគឺដើម្បីរំដោះភាពអវិជ្ជមាន និង ដោះស្រាយបញ្ហាមួយចំនួនដែលមនុស្សអវិជ្ជាមិនអាចធ្វើបាន ដូច្នេះហើយ វាមិនបានកំណត់ថា អ្នកនឹងក្លាយជាមានទ្រព្យសម្បត្តិច្រើននោះទេ។
ដោយសារតែគិតខុសបែបនេះហើយបានជាមនុស្សមួយចំនួនគិតថា ពួកគេនឹងក្លាយជាអ្នកមាននៅពេលរៀនចប់ ឬ រៀនបានលទ្ធផលល្អ ដោយមិនស្វែងរកឱកាស ឬ មើលពីចរន្តលុយ ប៉ុន្តែនៅពេលចូលដល់ការអនុវត្តន៍ការងារទើបដឹងថា អ្វីៗខុសពីការស្មាន ព្រោះវាទាមទារឲ្យមានចំណេះដឹង និង ជំនាញលើសពីអ្វីដែលរៀននៅសាលា។ មានសេដ្ឋី និង មហាសេដ្ឋីជាច្រើននៅលើពិភពលោករៀនមិនចប់បរិញ្ញាបត្រផង ប៉ុន្តែពួកគេជោគជ័យខ្លាំង ដោយសារអ្នកទាំងនោះយល់ច្បាស់អំពីចរន្តលុយ ដែលងាយនឹងទាញយក ដោយមិនចាំបាច់។
២) មិនផ្តល់តម្លៃលើការអប់រំ
ទោះបីជាស្ថិត ក្នុងស្ថានភាពណាក៏ដោយ ការអប់រំនៅតែជាចំណុចដែលមានតម្លៃមិនអាចខ្វះបាន។ ដូច្នេះហើយបានជា ប្រទេសជាច្រើននៅលើពិភពលោកខិតខំពង្រឹងវិស័យអប់រំឲ្យកាន់តែប្រសើរ ជាងមុនទៅទៀត។ អ្នកខ្លះយល់ច្រឡំដោយគិតថា ការអប់រំគឺគ្មានតម្លៃនោះទេ ព្រោះឃើញសេដ្ឋី និង មហាសេដ្ឋីជាច្រើននៅលើពិភពលោកសុទ្ធតែរៀនមិនចប់បរិញ្ញាបត្រផង ដែរ។ ថ្វីត្បិតតែការមើលឃើញរបស់ពួកគេ គឺជារឿងពិតមែន ប៉ុន្តែវាគ្រាន់តែជាជ្រុងមួយប៉ុណ្ណោះនៃពិភពលោក ។
មហាសេដ្ឋីទាំងនោះសុខចិត្តបោះបង់ការសិក្សានៅមហាវិទ្យាល័យដើម្បី ហក់ចូលក្នុងវិស័យជំនួញក៏ដោយសារមើលឃើញពីឱកាសល្អ ពោលគឺមិនមែនពួកគេមិនផ្តល់តម្លៃលើការអប់រំនោះឡើយ។ បើគ្មានចំណេះដឹងទេ ពួកគេក៏មិនអាចមានលទ្ធភាពគ្រប់គ្រាន់ក្នុងការដឹកនាំក្រុមហ៊ុនធំៗ បែបនេះដែរ។ ដូច្នេះអាចនិយាយបានថា បើអ្នកជាមនុស្សដែលមើលស្រាលលើវិស័យអប់រំ អ្នកនឹងគ្មានថ្ងៃដែលអាចសាងទ្រព្យសម្បត្តិច្រើននៅពេលអនាគតបាន ឡើយ។
៣) ចូលចិត្តរស់នៅតាមតែរបៀបចាស់គំរឹល
មនុស្សដែលចូលចិត្តរស់នៅ ឬ ធ្វើអ្វីដដែលៗ គឺមានន័យថា គ្មានការអភិវឌ្ឍន៍ខ្លួន។ ពីមួយថ្ងៃទៅមួយថ្ងៃ ស្ថានភាពសេដ្ឋកិច្ច សង្គម និង នយោបាយមិនដែលនៅថេរមួយកន្លែងឡើយ ដូច្នេះបើអ្នកមិនចេះបត់បែន និង ច្នៃធ្វើយ៉ាងណាឲ្យខ្លួនមានសមត្ថភាព និងជំនាញដើម្បីឆ្លើយតបទៅនឹងស្ថានភាពជាក់ស្តែង។
បើអ្នកធ្វើអ្វីតាមតែរបៀបចាស់ ឬ ទម្លាប់ដដែលៗ វាពិតជាមានការលំបាកខ្លាំងណាស់ ក្នុងការប្រជែងយកឱកាសដើម្បីទទួលបានភាពជោគជ័យក្នុងជីវិត ជាពិសេសភាពជោគជ័យក្នុងវិស័យជំនួញ ដើម្បីក្លាយជាអ្នកមាន។ អ្នកដែលជោគជ័យក្នុងវិស័យជំនួញសុទ្ធតែជាមនុស្សដែលពូកែចាប់យក ឱកាស ដើម្បីប្រែក្លាយជីវិតទៅរកភាពអស្ចារ្យ៕
